除草日

於香港回來後都未有坐定定寫下嘢, 都係時候為個blog除下草啦~

唔 經唔覺回來都有個多月了, 離開只有一個月, 番工便發現連新的project manager都走埋, 黎個再新啲既, my god 啦~ 半年前決定留於呢個project既原因都係因為個pm好, 而家走完一個又一個, 仲黎個老廢柴G人, 一個月黎見佢加加埋埋都冇十個鐘, 樣樣都話自己唔得閑做要我地做埋, 比埋份人工我地丫笨... 昨日話說要同佢一齊做個員工檢討, 這是我昨日番工既最大原因, 點知G人遲左半個鐘都未出現, 最後話因為自己太新未有足夠時間了解我工作表現而唔做檢討...........XXYZ! 算, 還總今年都係冇人工加, 做唔做影響不大. 香港回來後見到G人已發現不對勁, 已向部門主管要求調到一個新project, 但都要等到起碼二月尾... 唉... 就花多點時間於三月的考試吧

尚有一個星期就起程往非洲去, 但奇怪的心情沒有特別興奮. 雖然看B妹的blog好似很有趣很新奇的, 但不知何解沒有特別期待. 不過回來後會跟大家分享下.

今 日好同事A某約我去溜冰, 但天寒地凍又有些咳所以推掉了. 星期日才跟A某到聖誕遊樂場逛, 人多得有點煩厭, 就連想買隻狗食都要排幾十分鐘, 完全享受不到聖誕氣氛. 到遊樂場前跟樓上新加坡太太到大型跳蚤市場逛了兩個幾鐘, 雖然好多垃圾, 但有好多只會於外國殘片才會見到的"古董", 很有趣. 聽說有人於這些地方花五十元買了幅畫, 但用二千蚊賣了, 原來識的話真的可以於這些市場掘金! 我就用了六十五元買了一套原本百幾二百蚊既丹麥皇室枱蓆, 新的, 很便宜. 還有用了二十元買了一部很古老的日本造柯達相機給收藏相機的朋友, 見到有好多很有趣的古物, 藉得一去!

等了又等

這不是關於陳潔儀的歌, 而是關於一個我一生人中遇到最無能, 最無效率, 最無得救的部門--丹麥的入境處. 前兩年都已領教過其工作效率, 例如要用半年等出一個工作證(已獲聘), 每次致電都要輪候至少十五分鐘, 每天的辦公時間只有三小時等等. 但今次是絶對的無能. 話說我四月時已申請延長工作證, 六月接到書面通知申請已獲得批准, 並會於一個月內寄上我的住戶證. 但到七月中我還未有收到, 於是致電到辦公室詢問, 那接聽的女士說他們的發咭出了問題, 造咭的工司未能造咭, 要我耐心等候, 到八月廿多日我再致電查詢情況, 今次另一女士說電腦顯示他們並沒有替我訂咭, 程序出錯了, 會替我重新訂一張, 好了, 到昨天十月四日, 我再致電一次, 但我所聽到的跟前一次一模一樣: "出錯了, 沒有訂咭", 我說: "一個半月前我致電時已說出錯, 說會再訂一張, 我過兩個星期便要出國, 就因這原因我幾番致電, 而你們一錯再錯..." 女士截斷我的對話回應到: "我無話可說, 但咭無可能兩星期內出到, 你要帶護照到我們的辦公室領一個簽證", "(FXXX U)好吧!", 所以我只好明天提早三時放工到其辦公室走一趟(星期四多開兩小時給上班人仕).

一個那麼發達的國家, 服務水平如此的低劣, 我想是人民不大愛投訢的結果. 在這裡生活, 等已漸漸成了一個自然的習慣.

Michaaaaaaael !!

剛看完Michael Bolton既演唱會回來, 急不及待的要寫低我既經歷, 做個好好的回憶.

演唱會原定八時開始, 我七時半出門口, 會場距離我家只有三分鐘步行路程, 所以我很早便入場. 由於阿b對MB無特別興趣, 所以我今次單拖. 入場後到售賣紀念品的檔攤看看, 見到有最新專輯, 有大字寫著: "Only available here"(只在此處發售), 職員說是因為歐洲未有發售, 所以在外買不到, 身上没有足夠現金, 檔子又不收咭, 心想香港應該有得買吧~ 所以回頭就走. 由於觀眾遲遲未坐定, 故演唱會遲了十五分鐘才開始. 心情無上次睇MC咁興奮, 可能是環境的問題吧 (亦可能因為上次是免費!).

坐在距離台第八行, 好近, 因為個會場唔係好大, 最多都係坐到幾百人, 得一面台, 所以就好似係前面咁, 香港的演唱會好難可以有咁近. 呢度既人唔會好似香港人咁撲晒出去握手, 所以除在第一行外, 正常都唔會掂到. 唱左好多首歌, 好多都未聽過, 識既有Georgia, Soul Provider, How am I Supposed to Live Without You 等等, 好正, 他的聲線唱現場真係無得頂, 唔知可以點形容, 不過一定唔會忘記. 除左MB之外, 仲有兩個結他手, 一個KEYBOARD, 兩個鼓手, 一個SAXPHONE同三個女舞蹈員, 全部都做得好好. 上半場大家都係坐定定睇, 不過當然有不斷拍掌同叫囂, 到了中場有一首歌只有音樂, 初時以為只是換衫, 點知佢忽然出現係後面, 企左喺櫈上唱"When a Man Loves a Woman", 全場立刻企晒起身睇, 我即刻就意識到佢會跟住走廊行上台, 嘩~~ 機會呀! 我坐離走廊第三個位, 今次無死啦! 行到我前面, 緊係即刻申手去握啦! 但係比隔離個女人搶左個機會, 佢離開我果行既一刻我就忍唔住大叫"MICHAEL~~", 佢即刻拎轉握我隻手, 仲向我單單眼!!!!!!!!!!!!!!!!!!!!!!! 嘩, 電親呀! 雖然佢好老, 仲唔係靚仔, 不過係第一次同明星握手, 當然係好興奮啦!! 隻手要十日唔洗先得! 呢首歌之後大家都好興奮, 所以之後全場都係企係度跳住舞黎睇. 不過最美中不足係時間太短, 兩個鐘都唔夠, 好似大家興起後就散場咁. 有少少唔多夠喉, 不過握到手就當補番啦~ 佢用How am I Supposed to Live Without You完場, 大家同佢一齊唱, 氣紛好好, 最後大家都有些依依不捨, 有些觀眾離場後還哼著這首歌.

今次演唱會, 係一個好靚既回憶. :)

開放社會的尺度

開放可以有好多不同的範疇, 都有好多不同的層次. 一個開放的社會人民可以大膽地做多元化的事, 正面地看可以鼓勵人民無所顧忌地發揮,思考同創做, 大家可以做自己喜歡做的事而不用理會各種規矩限制, 應該是件好事, 不過大家可以聽聽以下既故事才再分析:

丹 麥我認為係一個高度開放既社會, 除左係殺人放火打刧等等, 人民基本上可以做任何既事, 比如話小朋友番學一路到成十多歲才開始打開書本學書本上既知識, 之前都係學下生存技巧, 生活技能, 參觀下博物館等等, 所以我每日番工都會見到有好多小朋友一群一群的出outing. 很多小女孩十多歲的穿起超迷你短裙化上妝的上學, 多有趣! 最近聽到有個丹麥人朋友話有一間小學, 採用完全開放形式教學, 即是學生可以自由選擇上堂與否, 自出自入, 喜歡的話可以入課室坐一會, 不喜歡的話可以到室外抽根煙, 對於學子來說, 這簡直是一個天堂! 可不要以為這是特殊學校啊! 放學後做咩好呢? 陽光譜照的話便去去公園晒太陽, 要晒一身古銅色的話就得除下上衣, 內衣都不可以, 因為著tub top 不好看! 所以這些日子到公園走走真是精彩, 大部份人都是赤條條的, 不要以為這是個別例子, 無論是女孩, 年輕女性, 中年或是六十過外, 她們都愛這樣的享受陽光, 可能因為這個國家有太陽的日子不到三份一, 暖而有陽光的日子更少之又少, 所以一有機會就要"毫無保留"的去盡情享受吧~ 日落西山要回家, 按開電視看看有什麼精彩節目, 嘩~ 家庭電視時間都可以看到女人無上裝, 男人無下裝, 或是激情肉搏的精彩鏡頭, 就連打影都不用, 既然是人類生活的一部份, 那就不用遮遮掩掩了! 昨日我到公共圖書館借小朋友圖書, 目的是練習丹麥文, 走到兒童圖書部, 那裡放了些畫展作品, 估估我看到什麼? 眼前的是數幅線圖, 而畫中的竟是赤裸的女性, 有一幅起初我以為眼花睇錯的作品, 竟然是一個男性赤裸裸的壓在一個赤裸裸的女性上, 花了我數十秒去說服我眼前所看到的是我所想的, 並不是畫畫得不好, 一眼就可以看出畫是什麼東東, 只是不肯相信這些畫會於那個地點出現罷了~ 我小時候看到的畫展都只是太陽, 蝴蝶, 白兔等行貨, 今次真的大開眼界!

除了這些外還有很多例子, 不過我相信大家都已經有足夠資料去分析了.

小魚兒+大舊

今朝一早起身就見到個魚缸有兩條小魚夾住左, 又生左啦~~ 因為趕住番工既關係我只有救左夾住左果兩條脫離險境, 但係無分開魚仔同大魚, 直到放工番屋企, 花左成兩個鐘去救佢地, 總共救左二十三條, 都仲有兩條係個大缸度未救到, 而家總數係有五十六條魚呀!

坐對面既大舊同事今因繼續問我點解個系統有問題, 尋日都已經話左比佢聽係啲data, 今日一番到去佢又嘈, 唉... 咁大個腦都唔知放左啲咩, 自己放啲bug入去問我點解有bug, 都唔知點解釋佢先會知係佢自己錯, 跟住我終於忍唔住出手, 不出十五分鐘己經搵到個解決方法, 但係都要解釋三十分鐘佢先知係佢既data有問題而唔係我啲code既問題, 有時做programmer唔係拎住支鎚係咁dup就得既~ 要分析同思考架!

大計

呢度啲人平均學識水平都好高, 識親既朋友唔係博士就係碩士, 有時覺得自己好似中五畢業咁, 唔可以話自悲, 不過有時都覺得有啲差距, 而家連老白都讀緊個碩士, 所以都係時候要諗下讀番書, 不過, 讀咩呢?? 呢兩年間唔時都會諗下自己到底想讀咩, 唔知自己到底想唔想花一生人係部電腦前, 不過都洗濕左個頭, 唔做呢行可以做啲咩呢, 唔通由頭黎過? 無咁既時間同金錢. 如果讀d商科, 又唔知自己係咪真係鐘意, 唔想重蹈覆轍, 都係要謹慎啲好. 而家既心水係讀bioinformatics, 係把電腦技術應用係生物研究上, 大家點睇?

期待歸家

仲有唔夠一個月就番香港, 心裡一路都好期待. 距離我上一次見親戚朋友都有差不多一年了, 雖然唔算好長, 但係夾埋前一年我都只係有兩個星期係香港, 即係兩年裏我只有兩個星期係見到屋企人, 真係太少. 唔覺唔覺離開左屋企都有四年幾, 呢幾年我既生活比以前改變左好多, 簡單左好多. 而家日日都係番工, 放工, 買餸, 煮飯, 收拾, 睇電視, 訓覺. 星期一至五都係咁既routine. 而星期六同星期日都係有時行下街, 有時行下公園, 有時街都唔出, 係屋企打下機, 煮下甜品算, 呢種生活從前真係諗都無諗過. 好多時都覺得呢種生活好悶, 好想返番以前忙過不停既日子, 好想過番一打個電話就可以約晒啲朋友出黎食飯吹水既生活, 不過我都知有得必有失, 而家咁平淡既生活係香港又會好想有, 而且我而家係工作上既經驗係香港未必會搵到, 希望儲埋呢啲保貴既經驗第日可以搵份好啲既工啦~ 但係真係好掛住香港既人, 係呢度無咩朋友, 就算有, 都係及不上陪著我成長既一群, 可以由天談到地, 無所不談, 雖然買左個skype既dial in 號碼, 不過唔知點解都無朋友打比我, 可能我已經離開得太耐, 己經漸漸被人遺忘了...

魚講

養左魚年半, 屋企個魚缸啲魚成日都死, 有時見到佢地病都唔知可以點醫佢, 都幾氣餒. 直到最近先有d起色, 條guppy大約三個月前大左肚, 我一路都唔知, 直到有一日放工番屋企見到有d塵咁大既魚仔游黎游去先知有喜, 即刻出手去救起佢地(佢地會比個阿媽同其他魚食架!), 有成八條咁多呀! 都不知幾興奮, 之後係網上搵資料睇下點樣湊大佢地, 點知發現呢種魚受精後會個個月生仔, 要生四五次咁多先會完!! 於是上個月我又見到有新既魚仔, 呢次救番成廿條咁多! 真係足蟲~ 而家個缸有成三十條魚, 條媽媽個肚又一日一日咁大, 睇黎佢過幾日又會生多次, 可能過多兩個月我會有成百條魚... 都唔知點養好! 唯有見步行步啦. 今次我為大家介紹下我個魚缸內既其中幾位成員, 從左起係一群魚, 當中有啲兩個月大既小朋友, 中間係蝦先生, 而右邊既係不斷大肚既媽媽:

做個好鼓手

近年聽得rock多開始左鍾意鼓, bom ba ba bom~ ba, 去concert睇到啲鼓手打鼓好有型, 一路心陏陏想學, 幾個月前有個熱愛打鼓既師弟黎實習,同佢傾下傾下激起左我學鼓既心, 跟左佢去間賣鼓既鋪頭買左個drum pad同鼓棍, 仲去音樂夜校報埋名讀bb班, 岩岩個星期一係第二堂, 學左d好基本既節奏, 第一次打真既鼓, 好好玩, 個老師仲話我學得快, 有potential, 可能佢真係唔知有學生會番屋企勤力練習呢~~~ 而家好鬼想買套真既drum set黎打呀, 但係呢個係夢想呀, 因為除左買個幾千蚊既鼓之外, 仲要買一間唔會噪到人既屋... 係一個大投資!

廿幾歲人先做個小FANS

七月中MARIAH CAREY黎左哥本哈根演唱, 係佢第一次黎童話王國. 作為一個鐘意左佢十幾年既FANS我緊係唔會錯過, 簡直有啲夢想成真既感覺.

初 時以為自己都已經廿幾歲人, 都係去係咁而襯下熱鬧, 點知一去到個公園門口既龍尾時已經開始有少少緊張, 好想可以快啲入去霸個好位, 仲以為自己早左三個鐘入去等可以有個頭位(個演唱會係FREE "STANDING" 架!! 唔洗買飛, 只係比入公園既入場費), 點知原來MARIAH係呢度都有咁多人鐘意, 都幾多人已經係個台前面攤晒係度晒太陽, 好彩我都唔係企得好遠, 大約都只係五六個企行位, 等左好耐先開場, 一開場時我緊張既情緒暴升, 呢次係我有生以來第一次有做FANS見到偶像既感覺, 而家先知點解啲人見到偶像會咁瘋癲.

個 演唱會唔係唱左好耐, 一約個半鐘, 都唱左好多首耳熟能詳既作品, 好似DREAM LOVER, HERO, WITHOUT YOU等等當然唔少得, 佢既表演真係好正, 又唱又跳, 仲有跟住佢四圍去既DANCERS同和唱, 都幾有氣派, 當然加埋外國睇演唱會既氣氛就更加無得頂. 最緊要係唔洗比幾百蚊去坐山頂, 真係等幾個鐘都抵晒, 唔知第時仲會唔會有幾會睇佢既演唱會呢?

十月一日到MICHAEL BOLTON啦, 但係果個係正式演唱會, 即係要買飛, 要成五百蚊架... 但係好想睇!

非洲故事

自從開左個Blog, 寫左幾句行貨以來, 今次係第一次真正坐底寫啲嘢. 仲叫自己花多少少心機用中文寫. 點解呢? 我發現自己已經有好多中文字諗唔起點寫啦... 死火! 而家打中文字既時間簡直可以同蝸牛行路, 或者係打坐(即係便秘如廁)所需既時間不分高下. 早輪寫左張postcard比屋企, 我老豆居然笑我啲字同一"住"蟲無分別..... >.< 氣死我. 希望我有啲恆心繼續死多啲posts啦.

其實上述既都只係一部份原因, 激起我開始寫post既原因係我星期日坐在係度睇電視, 今個月BBC電視台係非洲月, 不斷播放好多關於非洲既記錄片. 我好鐘意睇, 因為平日接觸到有關非洲實況既機會唔係好多, 自己更加無機會經歷到最殘酷既現實. 平時睇到好似樂施會之類既報導都只係關於窮困, 饑荒等情況, 同我今次睇到既好唔同, 今次睇到既要震撼得多.

星 期日果集其中一部份講關於烏干達(Uganda)的小孩, 烏干達係一個非常貧困的國家, 長期要依賴聯合國的援助. 而國內有一個與政府對抗的組織, 這組織擁有自己的軍隊, 呢啲軍隊經常深夜到一些村落去捊虜小孩, 從而將佢地洗腦, 培育成為這個組織的新血. 因為呢啲小孩既父母無能力抵抗, 佢地只好一早拾定包伏, 軍隊一到就叫晒啲小朋友"着早", 所以由呢啲村落通往市鎮的泥路上, 經常有無數的小孩帶住大包小包的深夜上路, 避開軍隊的追捕, 係電視上見到有些小朋友只有五六歲, 佢地一路漫無目的的走, 行得累就放底行李係路邊小睡, 係佢地既眼內我睇唔到恐懼, 只有疲倦同埋無奈, 好似唔知自己點解要黑夜離開屋企, 又唔知自己要去邊度咁, 可能佢地都太年幼了. 但講到呢度都仲只係開場白, 之後記者訪問左兩個小孩, 佢地都係曾經被捉過而僥倖逃脫的"幸運兒". 佢地憶述被捕既經歷. 男的一個說: "我們被捆綁住坐在河邊, 其中一個小孩暗中逃脫但被捉回, 之後軍人叫其他小孩圍成圈, 把這個逃脫的小孩放於中間, 然後叫我們將佢打死, 之後仲要係佢個腦上塗血, 如果不順從的話就要被打", 另外女的一個說: "我們數個女孩被捆綁在一起, 其中一個試著逃走但被發現, 軍人把她捉回, 然後吩咐其他女孩將佢活活咬死, 如果有人咬一口後牙上没有皮沾著的話就要被罰", 聽到呢度我個心好寒好不安, 呢兩個小孩都只有七八歲, 佢地所經歷過既我從前從未有想像過, 比我聽過最慘既人仲要慘, 點解係世界既另一角落會有一啲咁可怕既人, 咁淒慘既事發生, 而世界上大部份既人對呢啲事都聞所未聞? 到底係咪我地從來未有去關心過呢啲不幸既人?

睇到呢啲小朋友, 好有衝動想去幫佢地, 有些少改變左我從事義工的方向和想法. 我知道從呢啲記錄片所睇到既只會係真實的一少部份, 有更多小孩所經歷過的未有被訪問到, 而可怕既事亦可能正於其他地方發生. 我們都太幸福, 而太忽略自己生活圈子以外既事了. 呢個故事同呢幾個小孩的影子每日都係我腦海中出 現, 我不自覺的每日重複係度諗呢件事, 記者最後講果句"They are just too poor to live"不斷的係我耳邊迴響, 我的起心肝去寫係呢度, 都係想多啲人知到有呢啲事發生, 希望大家會關注呢啲不幸既人, 只有聯合國既努力真係好唔足夠.

First post

I have just created this blog. Do not know what to add here yet, hope I can gather my friends and co-workers with different interest here. So I can easily keep in touch and share information with everybody.